8 DE MARZO – A VOZ DO MOVEMENTO VECIÑAL GALEGO
Neste 8 de marzo, Día Internacional das Mulleres, a directiva da Confederación Galega de Asociacións
Veciñais Rosalía de Castro (COGAVE) quere expresar publicamente o seu compromiso firme e continuado coa
igualdade real entre mulleres e homes.
O movemento veciñal galego non sería o que é sen a presenza, o traballo e a entrega das mulleres. Son elas
quen, ao longo de décadas, sostiveron asociacións, impulsaron iniciativas sociais, defenderon servizos
públicos, organizaron redes de apoio e estiveron na primeira liña cando fixo falta dar un paso adiante polos
dereitos da veciñanza.
Hoxe vivimos tempos de incerteza nos que determinados discursos pretenden minimizar ou cuestionar
avances que custaron anos de loita e esforzo colectivo. Desde a COGAVE temos claro que non podemos
permitir nin un paso atrás. A igualdade non é unha opción ideolóxica: é unha cuestión de xustiza democrática
e de dignidade social.
Defendemos barrios seguros para todas, espazos de participación onde as mulleres teñan voz e capacidade
de decisión, políticas públicas que recoñezan o valor dos coidados e medidas efectivas contra calquera
forma de violencia machista. Apostamos por unha sociedade onde as novas xeracións medren en igualdade,
respecto e corresponsabilidade. Como directiva da COGAVE reafirmamos que o feminismo forma parte do
ADN do movemento veciñal: porque significa participación, significa comunidade e significa defensa do ben
común.
Este 8M queremos agradecer o labor silencioso e constante de tantas mulleres veciñais que, día tras día,
constrúen cohesión social desde os barrios e parroquias de Galicia.
Seguiremos traballando por unha Galicia máis igualitaria, máis xusta e máis democrática.
